रणभुमी डेस्क सोमबार, चैत्र १०, २०८१
विराटनगर / सशस्त्र प्रहरी बलको एक गस्ती टोलीले विराटनगर महानगरपालिका वडा नं. १७ मटेरुवा सीमा क्षेत्रबाट गैरकानूनी रूपमा नेपाल भित्र्याउँदै गरेको औषधिजन्य सामग्री बरामद गरेको छ। चैत ११ गते दिउँसो २ बजेको समयमा सशस्त्र प्रहरी निरीक्षक भुपेन्द्र बस्नेतको कमाण्डमा खटिएको ७ जनाको मोबाइल गस्ती टोलीले २ लाख ६६ हजार रुपैयाँ मूल्य बराबरको अवैध औषधि बरामद गरेको हो।
बरामद भएको सामग्रीमा एम केयर मल्टिभिटामिन बी १२ नामगरेको ५९० प्याकेट (मूल्य रु. २ लाख ३६ हजार) र बोर्न कार्ट नामको १५० पत्ता ट्याब्लेट (मूल्य रु. ३० हजार) रहेको थियो। यी औषधिजन्य पदार्थहरू सशस्त्र प्रहरी बल, नेपाल प्रस्तावित सीमा सुरक्षा गुल्म रानीबाट औषधि व्यवस्था विभाग शाखा कार्यालय विराटनगरमा पठाइएको थियो।
विभागले जाँच गरी “औषधिका लागि नभएर भिटामिन न्युट्रास्युटिकल” भएको मौखिक जानकारी दिँदै नष्ट गर्न सुझाव दिएपछि सशस्त्र प्रहरीले स्थानीय तथा सञ्चारकर्मीको रोहबरमा गुल्म परिसरभित्र खाडल खनी विधिवत् रूपमा नष्ट गरेको छ।
यसैबीच, सीमा क्षेत्रमा अवैध कारोबार नियन्त्रण गर्न सशस्त्र प्रहरी बलले निरन्तर गस्ती तथा निगरानी बढाएको छ। चैत्र १० गते आईतवार साँझ सवा ५ बजेको समयमा विराटनगर भन्सार कार्यालयको रानी नाकाको २ नम्बर ढाटबाट सोही टोलीले सवारीसाधन चेकजाँच गर्ने क्रममा भारतबाट भन्सार छली नेपाल ल्याउँदै गरेको ५ लाख ४० हजार १२५ रुपैयाँ मूल्य बराबरको चस्माको लेन्स र आँखा उपचारका उपकरणहरू बरामद गरी भन्सार कार्यालय रानीमा दाखिला गरेका छन्।
यी दुवै घटनाले सीमा क्षेत्रमा हुने अवैध कारोबार नियन्त्रणमा सशस्त्र प्रहरी बलको सक्रियता बढेको देखिन्छ।
यहाँ कमेन्ट गर्नुहोस्