रणभुमी डेस्क आइतबार, चैत्र ०९, २०८१
विराटनगर / करिम फाउन्डेसनको आयोजनामा रानीमा सामूहिक रोजा खोल्ने कार्यक्रम सम्पन्न भएको छ। इस्लाम धर्मावलम्बीहरुको पवित्र चाड रमजानको महिना चलिरहेको बेला चैत्र ९ गते शनिवार साँझ रोजा बसेका करिब ५०० भन्दा बढी इस्लाम धर्मावलम्बीहरुले सामूहिक रुपमा रोजा खोलेका छन्।
कार्यक्रममा कोशी प्रदेशका मोरङ्ग जिल्ला क्षेत्र नं ५ (२) बाट निर्वाचित प्रदेश सांसद अमृत अर्याल, जिल्ला प्रहरी कार्यालय मोरङ्ग प्रवक्ता बेद प्रकाश जोशी, इलका प्रहरी कार्यालय रानी प्रमुख प्रकाश थापा लगायत अन्य विशिष्ट व्यक्तित्वहरुको उपस्थिति रहेको थियो।
रमजान इस्लाम धर्मावलम्बीहरूको महत्त्वपूर्ण चाड हो, जसलाई कुरानले धेरै ठूलो स्थान दिएको छ। एक महिनासम्म मनाइने यो चाडमा सात वर्षदेखिका सबै व्यक्ति अनिवार्य रोजा (उपवास) बस्नुपर्ने हुन्छ। घाम उदाउनुभन्दा डेढ घण्टाअगावै सरगाही (खानेकुरा) खाएर प्रारम्भ गरिने रोजा घाम अस्ताएपछि फलफूल तथा मिठाइ खाएर समाप्त गरिन्छ। यो समयलाई रोजा खोल्ने समय भनिन्छ।
स्थानीय स्तरमा समाजसेवा र जनचेतनामूलक कार्यमा अग्रणी भूमिका खेलिरहेको संस्था करिम फाउन्डेसनले रानी क्षेत्रका सम्पूर्ण रोजा बसेका इस्लाम धर्मावलम्बीहरुलाई निम्तो गरेर सामूहिक रुपमा सद्भावपूर्ण रोजा खोल्ने कार्यक्रमको आयोजना गरेको थियो।
कार्यक्रममा हिन्दू धर्मावलम्बीहरुलाई समेत निम्ता गरिएको थियो। हिन्दू धर्मावलम्बीहरुका लागि साकाहारी भोजन र फलफूलको प्रबन्ध गरिएको थियो भने मांसाहारीहरुका लागि बिर्यानी र दूधको लस्सीको व्यवस्था गरिएको थियो।
यस कार्यक्रमले समुदायबीच आपसी सद्भाव र भाइचारा प्रवर्द्धन गर्न महत्त्वपूर्ण भूमिका खेलेको छ। विभिन्न धर्म र संस्कृतिका मानिसहरुबीच एकताको भावना बढाउने यस्ता कार्यक्रमले समाजमा सामाजिक सद्भाव कायम गर्न सहयोग पुर्याउने विश्वास गरिएको छ।
यहाँ कमेन्ट गर्नुहोस्