रणभुमी डेस्क बुधबार, चैत्र ०५, २०८१
विराटनगर / सामान्य निर्माण कार्य गर्दा पनि हप्तौं महिनौंसम्म बिना सूचना बाटो अवरुद्ध गरिएका कारण विराटनगरमा दुर्घटनाको जोखिम बढ्दै गएको छ।विशेषगरी गल्ली सडक निर्माणको क्रममा निर्माण पक्षले बाटोमै जथाभावी बालुवा र गिट्टी थुपार्ने गरेका छन्।
स्थानीय बासिन्दाहरूका अनुसार, निर्माण कम्पनीको यस्तो लापरवाहीपूर्ण व्यवहारले गर्दा सोही बाटोमा पर्ने घरधनीहरूले पनि निर्माण सामग्रीहरू बाटोमै राख्न थालेका छन्। यसले दुर्घटनाको जोखिम थप बढाएको छ।
विराटनगर १५ हड्ताली हाटबाट भट्टा चौकतिर जाने बाटोमा पनि यस्तै समस्या देखिएको छ। हुनत आम नागरिकले पनि यस्तो कुराको चासो राख्नुपर्ने हो तर विडम्बना, यस्ता दुर्घटना हुँदा पनि कसैले सम्बन्धित निकायमा औपचारिक गुनासो समेत गर्दैनन्, जसले गर्दा यो प्रवृत्ति सर्वत्र यथावत रहेको छ।
यसरी बाटोमा थुपारिएका निर्माण सामग्रीहरूले हामीलाई सवारी चलाउन निकै गाह्रो भएको छ। विशेषगरी राति यो समस्या झन् बढी समस्या हुनेगरेको स्थानीयहरू बताउँछन् ।
पालिकामा नागरिकहरू निर्भिक र सुरक्षित महसुस गर्न सक्ने वातावरणको सृजना गर्नु स्थानीय सरकारको पनि दायित्व हो। त्यसैले यस्तो प्रकारको जोखिम न्यूनीकरण गर्न महानगरपालिकाले कडा कदम चाल्नु आवश्यक देखिन्छ।
यहाँ कमेन्ट गर्नुहोस्