रणभूमी डेस्क बिहिबार, माघ ०५, २०७९
विराटनगरस्थित कोशी अस्पतालले १८ दिने जिवित शिशुलाई मृत घोषणा गरेको बिषयलाई लिएर बुधबार रिपोर्टिङ गर्न गएका विराटनगरका एक पत्रकारमाथि दुव्र्यवहार गरेको बताईएको छ । लाईभ न्यूज रफ्तारका पत्रकार सोनुकुमार दासमाथि कोशी अस्पतालका मेसुु लक्ष्मी नारायण यादवले हातपात गर्दै दुर्व्यवहार गरेका छन् ।
कटहरी गाउँपालिका वडा नं. ३ निवासी दिलीप मुखिया र उमा मुखियाको १८ दिने शिशु छोरीको स्वास्थ्यमा समस्या देखिएर बुधबार अस्पतालको आकस्मिक कक्षमा भर्ना गरिएका जिवित शिशुलाई चिकित्सकीय टोलीले मृत घोषणा गरिदिएको थियो । शिशु जिवितै भएपनि अस्पतालको लापरबाहीका कारण उनलाई मृत घोषणा गरिएको थियो । सोही विषयमा समाचार संकलन गर्न पुगेका लाइभ न्यूजका पत्रकार सोनु कुमार दास माथि हातपात गर्दै कार्यकक्ष बाहिर निस्केको भिडियोमा देखिएको छ । अस्पताल भर्ना गरिएकी शिशुको नाम खुसी हो । १८ दिनअघि कोशी अस्पतालमै उमाले छोरीलाई जन्म दिएकी थिईन् । उनको नर्मल डेलिभरी भएको थियो । अस्पतालले मृत्यु भएको घोषणा गरिदिएपछि आफन्तले दाहसंस्कारको तयारीसहित शिशुलाई डिस्चार्ज गरी घर ल्याए । तर, ल्याएपछि १८ दिने खुसी जिवितै भेटिईन् । उनको साँस चलिरहेको थियो । उनले हातको औंला पनि चलाईन् । जिवितै रहेको चाल पाएपछि उनीहरुले पुुनः शिशुलाई उपचारका लागि गोल्डेन हस्पिटल भर्ना गरेका छन् । आकस्मिक कक्षका डा. लक्ष्मण चौधरीलाई जिवित शिशुलाई मृत घोषणा गर्नुको कारण माग गरेपछि चौधरीले गैह्रजिम्मेवार जवाफ दिएका थिए । डा. चौधरीको जवाफपछि आक्रोशित शिशुका आफन्तहरुले उनीमाथि हातपात समेत गरेका थिए । त्यसपछि सर्वसाधारणको भीड बढ्दै गएपछि ज्यान जोगाउन अस्पतालको पुर्व दक्षिणपट्टिको वाल नाघेर भागेका डा. चौधरी हालसम्म सम्पर्कमा आउन सकेका छैनन् । उनको फोन पनि स्वीच अफ गरिएको छ ।
यहाँ कमेन्ट गर्नुहोस्