रणभुमी डेस्क बुधबार, बैशाख ०३, २०८२
विराटनगर / नेकपा एमाले विराटनगर महानगर कमिटीको दोस्रो अधिवेशन शुरु भएसँगै नेतृत्व चयनको विषय अत्यन्त पेचिलो बन्दै गएको छ। अध्यक्षसहित दुई प्यानलबीच कडा प्रतिस्पर्धा हुने निश्चित भइसकेको अवस्थामा महिला उपसचिव पदमा कला डाँगीले आफ्नो सशक्त दाबेदारी प्रस्तुत गरेकी छन्।
पार्टी संस्थापन पक्षबाट उपसचिव पदकी प्रत्याशी डाँगीले प्राविधिक रूपमा एउटा समूहमा रहनुपर्ने बाध्यता भए पनि सबैको हृदय जितेर अगाडि बढ्ने दृढ संकल्प व्यक्त गरेकी छन्।
“मेरो राजनीतिक यात्रा २०६० सालमा महेन्द्र मोरङ क्याम्पसबाट एमाले निकट विद्यार्थी संगठन अनेरास्ववियुमा आबद्ध हुँदै सुरु भएको हो,” डाँगीले गौरवपूर्ण स्वरमा बताइन्। विद्यार्थी राजनीतिबाट अघि बढ्दै उनले पार्टीका श्रमिक र व्यावसायिक संगठनहरूमा उल्लेखनीय नेतृत्व प्रदान गरेकी छन्।
हाल राष्ट्रिय सौन्दर्यकर्मी युनियन कोशी प्रदेश कमिटीको अध्यक्षको महत्वपूर्ण जिम्मेवारी सम्हालिरहेकी डाँगी सामाजिक कार्यमा समेत अग्रणी भूमिकामा रहेको उनका निकटस्थहरू बताउँछन्। मजदुरहरूको अग्रणी संगठन जिफन्टमा समेत सक्रिय भूमिका निर्वाह गर्दै आएकी डाँगीले आफूलाई सबै पक्षको अतुलनीय समर्थन प्राप्त हुने विश्वास व्यक्त गरिन्।
“राजनीतिक दलहरूमा क्रमशः घट्दै गएको महिला नेतृत्वलाई सशक्त बनाउन मैले उपसचिव पदमा उम्मेदवारी दिएकी हुँ,” डाँगीले दृढतापूर्वक भनिन्। “राजनीतिमा कुनै न कुनै समूहमा आबद्ध हुनुपर्ने स्वाभाविक प्रक्रिया हो, तर मेरो लक्ष्य भनेको सबैलाई समेटेर एकताबद्ध रूपमा अगाडि बढ्नु हो। मैले कसैको मन दुखाएको छैन र सबैको अटूट समर्थन पाउनेमा पूर्ण विश्वस्त छु।”
उनले थप जोड दिँदै भनिन्, “नेतृत्वमा पुग्न खोज्ने महिलाहरूलाई स्थापित गराउन पार्टीका सम्पूर्ण नेता तथा प्रतिनिधिहरूले निर्णायक सहयोग गर्नुहुनेछ भन्ने अटल विश्वास लिएकी छु।”
महानगर अधिवेशनमा विराटनगर महानगरपालिकाका १९ वटा वडाबाट प्रत्यक्ष निर्वाचित २२० जना, १६ जनसंगठनबाट प्रतिनिधित्व गर्ने ७९ जना र विशेष मनोनित १५ जना गरी कुल ३१४ जना प्रतिनिधिले निर्णायक मतदानमा सहभागी हुनेछन्।
मंगलबार उद्घाटन भएको अधिवेशनको समारोहमा नेकपा एमालेका स्थायी कमिटी सदस्य एवं कोशी प्रदेश इन्चार्ज शेरधन राईले औपचारिक उद्घाटन गरेका थिए। मंगलबार अपरान्ह नै बन्दसत्रको प्रक्रिया अघि बढेको भए तापनि प्रतिनिधि परिचयपत्र र मनोनित प्रतिनिधिहरूको नामावली लगायतका महत्वपूर्ण विषयमा विवाद उत्पन्न भएपछि बुधबार बिहान ७ बजेसम्मका लागि अधिवेशनको बन्दसत्र स्थगित गरिएको छ।
यहाँ कमेन्ट गर्नुहोस्