रणभुमी डेस्क शुक्रबार, चैत्र २१, २०८१
काठमाडौं / राज्य व्यवस्था तथा सुशासन समितिको बैठकले तीनकुनेमा भएको हिंसात्मक घटनाको भर्त्सना गर्दै सरकारलाई विभिन्न निर्देशन दिएको छ।
समितिका सभापति रामहरि खतिवडाको अध्यक्षतामा सम्पन्न बैठक मुख्यतया चैत्र १५ गते राजधानीको तीनकुनेमा भएको विध्वंसात्मक घटनामा केन्द्रित रहेको थियो।
समितिले हिंसात्मक घटनाप्रति खेद प्रकट गर्दै घटनाका दोषीहरू उपर आवश्यक छानविन गरी कानूनी कारवाही अघि बढाउन सरकारलाई निर्देशन दिएको छ। साथै नेपाल प्रहरी र सशस्त्र प्रहरी बललाई आवश्यक साधन-स्रोत उपलब्ध गराउन बजेटको व्यवस्था गर्न पनि निर्देशन दिइएको छ।
बैठकले तीनकुने र आसपासका क्षेत्रमा अब आइन्दा कुनै पनि प्रकारका सभा, विरोध प्रदर्शन वा धर्ना गर्न अनुमति नदिन गृह मन्त्रालयलाई निर्देशन दिएको छ।
समितिले भविष्यमा यस्ता हिंसात्मक घटना दोहोरिन नदिन तथा संविधान, कानून एवं संघीय लोकतान्त्रिक गणतन्त्रात्मक राज्य व्यवस्थाको रक्षा गर्न गम्भीरताका साथ अघि बढ्न सरकारलाई सचेत गराएको सभापति खतिवडाले जानकारी दिए।
यहाँ कमेन्ट गर्नुहोस्