रणभुमी डेस्क शुक्रबार, चैत्र २१, २०८१
काठमाडौं / वैदेशिक रोजगारीका लागि पोल्याण्ड पठाइदिने प्रलोभन देखाई रकम ठगी गरेको अभियोगमा प्रहरीले तीन जनालाई बुधबार पक्राउ गरेको छ।
पक्राउ पर्नेहरूमा टोखा नगरपालिका-१ घर भई बुढानिलकण्ठ नगरपालिका-६ निवासी ३९ वर्षीय राजु बिक्रम राणा, ३५ वर्षीया रोशनी राणा र टोखा नगरपालिका-९ बस्ने कञ्चनपुर बेदकोट नगरपालिका-१० घर भएका ३३ वर्षीय भिम बहादुर महर रहेका छन्।
अनुसन्धानका अनुसार राजु र रोशनीले एक जना पीडितबाट ४ लाख १२ हजार रूपैयाँ लिएका थिए भने भिम बहादुरले दुई जना पीडितहरूबाट २ लाख रूपैयाँ लिई सम्पर्कविहीन भएका थिए। पीडितहरूको उजुरीपछि काठमाडौं उपत्यका अपराध अनुसन्धान कार्यालय टेकुबाट खटिएको प्रहरीले राजु र रोशनीलाई काठमाडौं महानगरपालिका-६ बौद्धबाट तथा भिम बहादुरलाई काठमाडौं महानगरपालिका-२६ बाट पक्राउ गरेको हो।
प्रहरीले पक्राउ परेका तीनै जनालाई थप अनुसन्धान तथा कारवाहीका लागि वैदेशिक रोजगार विभाग ताहाचल काठमाडौं पठाएको जनाएको छ।
यहाँ कमेन्ट गर्नुहोस्