रणभुमी डेस्क शुक्रबार, चैत्र २१, २०८१
काठमाडौं / सामाजिक सञ्जालको दुरुपयोग गर्ने कार्यमा संलग्न रहेको अभियोगमा काठमाडौं महानगरपालिका-९ सिनामंगलमा डेरा गरी बस्ने २७ वर्षीय राम बिहारी साफीलाई प्रहरीले बुधबार पक्राउ गरेको छ। साफी मूलतः सिराहा धनगढी नगरपालिका-७ गोलबजारका स्थायी बासिन्दा हुन्।
पीडितको उजुरी अनुसार, साफीले प्रेम सम्बन्धमा रहँदाका अन्तरङ्ग तस्विर तथा भिडियोहरू सम्बन्ध बिग्रिएपछि सामाजिक सञ्जालमा पोष्ट गरिदिने र पीडितका आफन्तलाई पठाइदिने भनी धम्क्याउँदै दुःख हैरानी दिएका थिए।
यही उजुरीको आधारमा साइबर ब्यूरोबाट खटिएको प्रहरी टोलीले साफीलाई काठमाडौंबाट पक्राउ गरेको हो। उनी माथि विद्युतीय (इलेक्ट्रोनिक) कारोबार ऐन, २०६३ अन्तर्गतको कसुरमा अनुसन्धान भइरहेको छ। जिल्ला अदालत काठमाडौंबाट ४ दिनको म्याद थप अनुमति लिई प्रहरीले थप अनुसन्धान गरिरहेको जनाएको छ।
साइबर अपराध विशेषज्ञहरूका अनुसार, अन्तरङ्ग तस्विर वा भिडियो प्रयोग गरी धम्की दिने वा ब्ल्याकमेल गर्ने अपराध नेपालमा पछिल्लो समय बढ्दो क्रममा रहेको छ। यस्ता अपराधले पीडितमा मानसिक तनाव, सामाजिक लाञ्छना र आत्महत्यासम्मका घटना निम्त्याउन सक्ने भएकाले प्रहरीले यस्ता अपराधमा कडा कारबाही गर्दै आएको जनाएको छ।
यहाँ कमेन्ट गर्नुहोस्