रणभुमी डेस्क शुक्रबार, चैत्र ०७, २०८१
विराटनगर / तीन दशकपछि विराटनगरमा आयोजना भएको धार्मिक कार्यक्रम रासलिला दर्शकहरूको उच्च मागका कारण एक दिन थप गरिएको छ। आयोजक श्रीहरी सत्संग समितिका अनुसार, चैत्र ९ गते शनिवारसम्म चल्ने भनिएको कार्यक्रम अब चैत्र १० गतेसम्म चल्ने भएको छ।
“सबैतिरबाट श्रीकृष्ण रासलिला कार्यक्रम अवलोकन गर्न आउने दर्शकहरूले कार्यक्रम थप हुनुपर्ने माग धेरैतिरबाट आएपछि समय थप गर्ने निर्णय गरिएको हो,” समितिका विराटनगर सम्भाग अध्यक्ष विद्यानन्द माझीले बताए।
विशेषज्ञहरूका अनुसार अन्य प्रकारका कार्यक्रमहरूमा समय थप हुने गरेपनि धार्मिक कार्यक्रममा समय थप हुने घटना भने कमै मात्र देख्न वा सुन्न सकिन्छ। यसले रासलिला प्रति स्थानीय धरमाप्रेमीहरुको गहिरो आस्था र रुचि देखाउँछ।
चैत्र ५ गतेदेखि सुरु भएको यस कार्यक्रममा ब्रज लोक कला संस्थान वृन्दावनबाट आमन्त्रित २१ जना कलाकारहरूको टोलीले यो भव्य रासलिला मञ्चन गरिरहेका छन्।
कार्यक्रम प्रत्येक दिन साँझको ६ बजेदेखि सुरु हुने र अब चैत्र १० गतेसम्म चल्ने जनाइएको छ।
यहाँ कमेन्ट गर्नुहोस्