रणभुमी डेस्क आइतबार, चैत्र ०२, २०८१
विराटनगर / श्रीहरि सत्संग समिति नेपालले धर्म, संस्कार र संस्कृति जागरण अभियान अन्तर्गत चैत्र ५ देखि ९ गतेसम्म बिराटनगरमा विशेष रासलीला कार्यक्रमको आयोजना गर्दैछ।
तीन दशक अघिदेखि नेपालमा सुरु भएको एकल अभियानले गाउँ-गाउँमा शिक्षा र संस्कारबाट वञ्चित जनजाति तथा सिमान्तकृत बालबालिकालाई लक्षित गरी संस्कार केन्द्रहरू स्थापना गरेको थियो। यही अभियानको निरन्तरतामा २०७८ सालको बसन्त पञ्चमीको दिन श्रीहरि सत्संग समिति नेपालको स्थापना भएको हो। यो संस्था पूर्ण रूपमा मुनाफारहित दर्तावाला संस्थाको रूपमा कार्यरत छ।
हाल यो संगठन पाँच प्रदेश (कोशी, मधेश, लुम्बिनी, सुदुरपश्चिम र बागमती) का १७ जिल्लामा ६४ जना पूर्णकालिक सेवावर्ती कार्यकर्ताहरूमार्फत आफ्नो अभियान सञ्चालन गरिरहेको छ। सत्संग भजन, कीर्तन, प्रवचन, कथा, प्रदर्शनी झाँकी र पूजा-आरतीको माध्यमबाट तराई, पहाड, गाउँ-गाउँमा धर्म र संस्कृति जागरणको कार्य भइरहेको छ। स्थानीय ग्राम समितिहरूमार्फत हजारौं गाउँवासीहरू यस अभियानमा जोडिएका छन्।
गैरकानूनी रूपमा भइरहेको धर्म परिवर्तनप्रति सचेत यस संगठनले विशेष पहल गरेको छ। संस्थाले नेपालका ग्रामीण क्षेत्रमा मन्दिरसमेत नभएका र हिन्दु धर्मका देवताहरूको बारेमा ज्ञान नभएका गाउँहरूमा पुगेर जनचेतना फैलाउने काम गर्दैछ।
संस्थाले एउटा नवीन प्रयोगअन्तर्गत “श्रीहरि रथ” तयार गरेको छ, जसमा श्री राम दरबार, लड्डू गोपाल तथा शिवलिंगका विग्रहसहितको मन्दिर र टिभी स्क्रिन जडान गरिएको छ। पाँच जनाको स्थायी सत्संग टोलीले रात्री प्रवासको समयमा भजन कीर्तन र कथा प्रस्तुत गर्दै गाउँ-गाउँमा धर्म संस्कृति संरक्षणको कार्य गरिरहेको छ।
यसका साथै संस्थाले गाउँ-गाउँमा सहभोज, लुगा वितरण, गीता तथा हनुमान चालिसा वितरण, रंगोली प्रतियोगिता, बालबालिकाद्वारा हनुमान चालिसा प्रतियोगिताजस्ता कार्यक्रमहरू सञ्चालन गरिरहेको छ।
संस्थाको कार्यमा ग्राम संगठन र नगर संगठन गरी दुई प्रकारका संरचनाहरू छन्। ग्राम संगठनमार्फत ग्रामीण क्षेत्रमा विभिन्न कार्यक्रम सञ्चालन गरिन्छ भने नगर संगठनले धन संग्रह गरी संस्थाको कार्यलाई अगाडि बढाउन सहयोग गर्दछ।
आगामी चैत्र ५ गतेदेखि ९ गतेसम्म बिराटनगर मेनरोडस्थित अतिथि सदनमा साँझ ६ बजेदेखि ९ बजेसम्म वृन्दावनबाट आउने २१ सदस्यीय कलाकार टोलीद्वारा दिव्य र भव्य कृष्ण लीला (रासलीला) प्रदर्शन हुने भएको छ।
यस आयोजनालाई भव्यरूपमा सम्पन्न गर्न वरिष्ठ समाजसेवी महेश कुमार स्वर्णकारको प्रमुख संयोजकत्वमा ५०५ सदस्यीय मूल आयोजन समिति र ३५ सदस्यीय कार्य सम्पादन समिति गठन गरिएको छ। संगठनमा राष्ट्रिय अध्यक्ष भीखम चन्द सरल, महासचिव रामजीवन अग्रवाल, राष्ट्रिय महिला समिति अध्यक्ष गिरिजा शारडा हुनुहुन्छ भने सम्भाग अध्यक्ष विद्यानन्द माझी, बिराटनगर च्याप्टर कार्यवाहक अध्यक्ष देबेन्द्र कुमार गुप्ता र मोरङ जिल्ला अध्यक्ष ओम प्रकाश अग्रवाल रहनुभएको छ।
यहाँ कमेन्ट गर्नुहोस्